أرحل خلاص أرجوك تكفى عشاني
مابي أشوفك من عيوني اليا طحت
غالي وأحبك وأفقدك في ثواني
لكن تغير طبعك أن جيت جرحت
يمكن ملل أو تعشق إنسان ثاني
والا بقربي ضاق صدرك ولا ارتحت
الله معك يا أغلى بشر احتواني
بضغط على قلبي وأبصبر اذا رحت
يبقى مكانك في الضلوع المحاني
ذكراك منحوته على خافقي نحت
لو إني أنسى كل واحد نساني
ماكان ليلي يعرف الصوت لا نحت
أصعب شعور تموت حلو الأماني
بيدين من يعرف غرامك وله بحت
روح وتأكد رغم ما منك جاني
أبذكرك بالخير لأمسيت واصبحت
ما أنسى زمانك لكن إذكر زماني
إذا خذاك الشوق لمي وسرحت
حفظت قلبك يوم قلبك مكاني
أبيه فوق بكل حاجه ماهو تحت
صحيح أحبك لكن أرحل عشاني
شينه أشوفك من عيوني اليا طحت
